سمعونا صوتكم .. السلام عنواانا

احم احم

خير يا مسلمة يا وش الخير؟؟

يا نقطانا معاكى

طيب قولوا لى الأول السلام عليكم يا مسلمة؟

ماشى يا مسلمة..السلام عليكى ^_^

و عليكم السلام و رحمة الله و بركاته

بصوا يا شباب..ببساطة و بدون رغى كتير

أنا مسلمة مصرية

بقول مش عايزة الرئيس مبارك كرئيس

كفاية أوى لحد هنا

بس دلوقتى جارتى عايزة مبارك

ها نعمل ايه؟؟

أنزل أنا وهى لميدان التحرير و نعمل زى التهريج اللى أنا شايفاه ده؟؟؟؟؟

أنا واحدة بتحب الموز و أختى بتكرهه

المفروض ايه اللى يحصل؟؟

أعمل حدود ما بين السرير بتاعى و بتاعها؟؟

أقول لبابا يكرشها لأنها بقت دسيسة و بتأيد البطيخ على الموز؟؟

أعتبرها جاسوسة على الموز؟؟

حد يرد عليا؟؟؟

يعنى ايه أبقى مصرى بضرب فى مصرى زيى لمجرد إنى أختلفت معاه فى وجهة نظرى؟؟

هو مش عايز الرئيس مبارك..هو حر

و إنت كمان ياللى عايزه حر

إنما نضرب ببعض؟؟

يا فرحة اللى ما تتسمى فينا

عيب يا شباب..طيب و الله لقيت واحدة فى بروفايلى شتمتنى أنا و صحباتى علشان قولت إنى منتظرة رئيس آخر

أيوة شتيمة..و ياريتها شتيمة واحدة

بس أنا عملت نفسى مش واخدة بالى و اتبعت شعار

هى الشتيمة بتلزق؟؟هههههههههههه

أرد عليها اشتمها زى أما هى عملت؟؟

لأ طبعا..لأنى مسلمة أولا و متربية ثانيا و مش متعصبة ثالثاً

إنما ألاقيكوا كشباب بتضربوا بعض فى الشارع و متجمعين على واحد مختلف مع رأيكوا و نازلين ضرب فيه؟؟؟؟؟؟

ليه؟؟؟

يا شباب فيه حاجة لازم كلنا نعترف بيها إن البلد بااااااااااااااظت

مبانى اتحرقت

حياة عملية وقفت

بنوك مفيش

البورصة صفر

التجار مستغلين الموضوع و بيغلوا الأسعار

أنزل أشترى كارت فودافون 100ألاقيه ب 140 ليه؟؟؟؟

و بالنظر لكل ده…مش فيه وقت نضيعه يا شباب فى إننا نتخانق مع بعض

عيب عليكوا و الله اللى بيحصل ده

لازم نفوق بقى شوية لإصلاح البلد دى

الرئيس مبارك هيمشى زى أما بعضنا عايز و أنا واحدة منكوا

الوزراء بيتغيروا

نائب رئيس و بقى موجود

الحكومة و بتمشى

جميل أوى كده..مش دى طلباتكوا؟؟

طيب غيرنا عايز ايه؟؟

غيرنا عايز يعمل فتنة ما بين حضرتك يا مؤيد للرئيس و يا معارض

هتديله الفرصة؟؟

هتستنى شخص زى البرادعى ماكنش موجود لا يوم 25 و لا 26 و لا 27 و لا 28 و كان فى النمسة

و فجأة جه و قال يهيص فى الهيصة و يبقى رئيس على قفانا..ها هنديله الفرصة؟؟

و برضه مع إحترامى للناس اللى عايزاه مع إنى مش فاهمة سبب لترشيحه من أساسه بس مفيش مشكلة وجهة نظركم أحترمها و على راسى

لغاية إمتى؟؟

ما نسيب لكل واحد وجهة نظره و فى نفس الوقت يبقى أخويا؟؟

طيب الملخص ايه يا مسلمة؟؟

الملخص أنا مش عايزة الرئيس و فى نفس الوقت ارفض عدم إحترامه

أرفض الأب اللى شايل بنته على ضهره و بيعلمها تقول حسنى اتجنن

أرفض أشوف لافتات بتشتم فى الراجل ده

أرفض ده أيا كان هو رجل حلو أو وحش

بس على الأقل أرفض عدم إحترامه لأنى

مسلــــــــمة ♥♥

دينى مش قالى إشتمى و لا هزأى

بس دينى قالى قولى وجهة نظرك و إختلفى زى أما إنتى عايزة بس مع إحترامك لوجهة نظر الغير

شباب..شكرا لأنكم طلعتوا صوتى

شكرا للجان الشعبية اللى قامت بدور الشرطة

شكراً و تصفيقا للشباب المصرى اللى نضف الشوارع

شكرا لتغييركم الماضى

شكرا للى قال رأيه بإحترام

و لكن

حان الوقت لنفوق

يعنى ايه؟؟

يعنى إنتى أختى و هو أخويا و كلنا مصريين

و نسيبنا من الخناق و الكلام الفارغ و يالا نقيم البلد دى تانى زى الأول

لا نلاقى المؤيدين عمالين يشتموا المعارضين و يقولوا اللى خربوا البلد أهم

و للا المعارضين يقعدوا يقولوا المؤيدين هيبوظوا تعب أيام فى ساعات

كل واحد ليه رايه و عليك أن تحترمه

شئت أم أبيت

أنا كمان نفسى أعرف رايكم فى اللى اتقال..هل إنتم مؤيدين و للا معارضين و ليه؟؟

و هل 30 سنة مش كانوا فرصة للرئيس مبارك لمن يطالب بإعطائه فرصة جديدة؟؟

مين أعطى الاوامر للشرطة بالإنسحاب؟؟ مين فتح السجون كلها فى وقت واحد؟؟

حابة أتناقش و اعرف فكركم و إزاى نبتدى فى الإصلاح من تانى

ملحوظة بس بسيطة قبل أما أمشى

اى كومنت فيه أى لفظ خارج ..مش محتاجة أقول إنه هيتمسح

بس طبعا المختلفين معايا فى الرأى إستحالة ألغى كومنتاتهم طالما إحنا بنتناقش بكل إحترام

و السلام عليكم

♥♥

وللامانة منقول (يعنى مسروق )