----------------------------
سمع هس .. العرض ابتدى
قرب يا بيه قربى يا مدام
الحقوا كرسى قبل الزحام
دى مسرحية هزلية
ديمقراطية عسكرية
عندنا فقرات .. مش عند حد
احلى مغامرات ولا اى حد
بادى الفقرات
الشعب كده ماشى على الحبل
من غير ميزان من غير مرسى
ولا له بدايه ولا آخر
سلى العبيط يمكن ينسى
وده مبدأ اخونا البعدا
احنا البهيمة اللى فـ ساقية
جتكوا البلا عايشين سعدا
لك يوم غضب جتكم داهية
تانى الفقرات .. شغل الحركات
ركب الصنم . زى البجم . هو الحكم
داس ع اللى مات
مضانى على ورق استفتا
عشمنا ان الصوت عمران
ومن اسكندرية لحد اسوان
قولنا " نعم " لجل العمران
قولنا اللى فات ما يتكرر
ولا حد فينا يتصور
اتاريك مضيت وانت مقرر
يروى الظمأ مُر العسكر !
آخر العروض
حطوا السدود
ولا يعلا صوت ولا حر يبان
مات الرجال على الحدود
سال الدما من غير عنوان
بالعكس علا السور اكتر
لا تعترض .. كان غيرك اشطر
هدينا سور وطريقنا نور
زود حصاره .. خلاها بور
بس احنا طامحين العزة
واملا السجون كمم الافواه
راجعين فى يوم ليكى يا غزة
جرح الوطن ازاى نسلاه .
--------------------------
كلام بديع من شاعر متميز :)
ليا الشرف انى استضيف قصيدته فى مدونتى :)
لــ احمد نجم
هناك تعليق واحد:
انا اللى ليا الشرف طبعاً ان كلامى ينزل على مدونة استاذتنا نوفا :) .. اشكرك بجد ، واتمنى انى اكون دايماً قد المسؤليه دى .. تحياتى ولكِ فائق الاحترام والتقدير :)))
إرسال تعليق